吉利汽車（00175）之前要「走出去」，收購美資福特旗下嘅富豪汽車，點知福特單「刁」未成事，吉利或者會先殺入英倫，收購英國的士生產商嘅主要股權，令英倫出名嘅流動地標「黑色的士」歸於中國旗下。
黑色的士係英倫嘅流動地標，歷史悠久，由一九四八年開始已經喺倫敦街道行走，好多遊客都搵呢啲的士做背景影相。黑色的士嘅生產商Manganese Bronze去年業績見紅，加上經營困難，為咗籌錢就考慮配售新股。
吉汽本身已經係Manganese Bronze股東，持股19.9%，仲同Manganese Bronze喺上海有個JV（聯營公司）。今次Manganese Bronze有集資需要，就向現有股東「撲水」，希望以每股70便士向吉汽發新股集資1,400萬英鎊，吉汽嘅持股量就會升至51%，一躍成為Manganese Bronze嘅控股股東。絲絲希望吉汽即使做咗大股東，都唔好改變黑色的士嘅風格，保留番呢啲英倫文化！
余絲韻