絲絲講場：陶葆璇放假陪太子練波
復活節將至，絲絲見唔少旅行團已經爆滿，好多「賓卡」亦打算趁長假期外遊，絲絲尋日見到花旗香港客戶管理總監陶葆璇，佢話囝囝入咗學校足球隊，放大假要陪囝囝練波，冇得外遊叉電！
雖然陶葆璇講到好似好惋惜咁，但其實一講起囝囝嘅威水嘢，佢個心都不知幾甜。陶葆璇話13歲嘅囝囝入咗足球隊，佢唔單止復活節假期，連之前個農曆新年假期都係陪囝囝練波，唔知佢遲啲會唔會帶埋囝囝去南非睇世界盃偷吓師呢？好多銀行家都要靠長假期叉電，但陶葆璇就話陪囝囝練波都係「緊守崗位」嘅一種責任，返工時面對客戶，放假陪小朋友練波，一樣可以平衡生活。
花旗延時營業有成效
花旗香港早前已經將分行營業時間延長到夜晚7點，陶葆璇話對於吸客好有幫助，今年初市場回穩，配合埋佢哋分行嘅擴張，今年一月及二月嘅營業額按年計都有雙位數字增長，聽落又真係幾好成績。
余絲韻