醫生同律師慨嘆「上唔到車」呢件事，早前引起社會好大回響，隔咗幾個月依然係話題。美聯集團（01200）做好多一、二手樓買賣嘅中介人，見盡樓市嘅高高低低，主席黃建業就同絲絲講，話依家好多市民「呻」難上車，其實係因為佢哋心頭太高，往往想一步登天，初次置業就想買鰂魚涌太古城及康怡花園呢類大型藍籌屋苑，梗係難買啦！
眼見依家咁多人話買唔到樓，佢就講番自己第一次做業主嘅經驗，話當時為咗買樓，日日死慳死抵，餐餐捱公仔麵，仲要同另一個朋友夾錢，先可以一嘗做業主嘅滋味，佢笑言夾錢嗰位朋友仲係男人嚟添。
佢又話依家樓市咁旺，市民買樓嘅意欲其實好強，只係唔識得揀選自己有能力負擔嘅屋苑入市，佢話初次買樓就應該先從細價嘅上車屋苑着手，之後因應自己經濟能力先再諗換樓。
絲絲覺得佢講得都啱，不過依家好多新界樓都賣得好貴，除非係樓齡高過絲絲年齡嘅單幢樓，否則都好難上車。你知啦，後生仔愈上唔到車就愈驚慌，愈驚慌就愈易做傻事，好容易冇計算清楚負擔能力就撲去買樓，變成樓奴。
余絲韻