美股強勢盡現，道指再破去年高位，唔知恒指係唔係感染風寒，自從去年底香港持續低溫後，港股體質仿似下降，就算美股創高位，反應都唔大，唔通內地收緊銀根帶出嘅後遺症真係深入六腑？
去年隻東岳集團（00189）走勢可謂大玩過山車，由最初0.4元起步炒上最高1.8元，及後又殺落1元，少啲膽汁都玩唔起。去年十一月東岳股價大幅起動，主要係一直持有2.3億股嘅霸菱，突然以1.18元沽晒畀內地嘅中誠信託，之後股價就大炒特炒。
東岳近期回調，雖然話個價曾低見過1元，其實只係幾日間嘅事，大部分時間仲喺1.2元之上，好明顯有人唔想帳面輸錢。
尋日東岳突然再開車，而去年炒得幾狠大家有眼睇，今次一於博佢炒穿2元，如果股價回頭再跌穿1.15元，才考慮止蝕。
古晨