大家仲記得上月平保（02318）公布嘅員工持股解禁方案嗎？估計有1.9萬名員工股股東，平均身家將激增200萬人仔，但要分3年減持，仲要攞40%嘅錢嚟交稅，搞到啲員工非常不滿，尋日仲有人去總部抗議添。
平保發言人之前話，員工持有公司股票最長嘅有成20年，佢哋理當獲得應有權益。不過大拿拿有成8.59億股限售股上市，對市場梗有衝擊，所以公司規定喺5年內，每年減持唔超過各自持股嘅30%。啲股份主要係由新豪時受託持有嘅，咁就意味啲員工首先要畀印花稅。
當然，仲要支付新豪時不菲嘅手續費同埋涉及嘅企業所得稅，到新豪時向員工股權益人支付收益時，還要代扣代繳20%個人所得稅……加加埋埋，啲員工股東至少有40%嘅錢用嚟畀稅，咁同個人畀稅相差成倍有多。
唔怪得啲員工唔高興，尋日有60幾名員工喺平保總部樓下拉晒橫額抗議。員工強烈要求解除新豪時託管，將新豪時持有嘅股票一次性過戶到股東名下。
余絲韻