繼「歐洲股神」安東尼波頓及「國際炒家」索羅斯以高姿態來港後，有「新股神」之稱嘅美盛資金管理主席米勒（Bill Miller）亦將於下周一抵港，發表對美國經濟及股市步向復甦嘅睇法。據悉今次係佢首次喺香港公開露面，往年佢只派出其愛將——投資組合經理Mary Chris Gay及海格斯壯（Robert Hagstrom）會晤投資者及開發布會。
公關話，米勒喺○七年亦有來港，但嗰次都係私底下與投資者見面。今年米勒親自上場開記招，與早排兩位「投資勁人」高調來港有冇關係？公關就話米勒成日都周圍飛，喜歡與投資者及記者朋友見面，下星期嚟亞洲公幹，除咗香港佢仲會去埋新加坡，所以下周一簡報會一完就要即刻走人。
講番呢位「新股神」，係過去40年唯一一位連續15年跑贏美國標普指數嘅「王牌基金經理」，佢掌舵嘅美盛價值基金（LMVT）喺○六年起雖然跑輸畀標指，但去年已收復失地，全年回報40.65%，遠遠領先標指嘅26.46%升幅。
余絲韻