自龔如心千億遺產爭奪戰過後，大家嘅焦點唔單止係陳振聰嘅下場，大家都<img src='/font/c8cf_5nbk.gif' border='0'/>住靜咗好多年嘅龔系股票有冇作為。唔知係咪靜咗太耐，彈跳力真係不同凡響，絲絲篤吓計數機，自官司有結果後，安寧控股（00128）、丹楓控股（00271）及博富臨置業（00225）喺冇實際消息支持下，竟分別累升229%、92%及47%！如果個升幅用嚟做善事，都應該造福好多人。
安寧已經炒咗一輪，尋日市場好似有轉炒「系內」其他股份嘅迹象，丹楓及博富臨呢兩隻股份尋日喺個市好靜嘅情況下，無端端升咗54%及24%，成為全日升幅最大嘅兩隻股份，並創下一年新高，丹楓嘅成交量高達5.35億股，係全日第六大成交股份，成交金額近6億元。至於安寧尋日雖然只升咗3.7%，但成交金額一樣差唔多有成6億元。
唔講真係冇留意，丹楓嘅主業係物業投資及發展，即係同華懋集團差唔多。丹楓喺收市後按例發表公告，話唔知股價及成交量點解會咁高。
絲絲梗要搵經紀老友「查找升因」，佢就話近日個市冇乜大方向，大市成交一日少過一日，大股冇得炒，投資者就轉炒細價股，尤其係「小甜甜」細佬龔仁心喺上周話考慮將華懋上市，大家憧憬龔系股份遲早有嘢搞，加上相比安寧，丹楓及博富臨嘅升幅仲「落後」好多，轉炒「相對落後」嘅股份都算合理喎！
余絲韻