港股悶咗咁多日，尋日終於借上證指數失守3,000點隊番少少，不過啲沽盤好一般，尾市又抽番上去，叫保住21,000點。大價股乏味炒作，資金開始搵啲細價股玩，適逢甜甜系股再起風雲，真係愈細粒愈好執，尤其是啲毫子股，古晨反而幾鍾意現時嘅市場氣氛，大市跌唔落，資金苦無出路轉戰股仔，又係炒友齊齊發功嘅時候。
甜甜系列炒得咁醒神，其實都係市場憧憬佢變身後做大做強，上個月剛轉名嘅金山能源（00663），去年收購兩個內蒙煤礦，變身做煤炭股。
金山能源幕後班底強勁，近日成立咗個顧問委員會，真係粒粒巨星，包括有前煤炭工業部部長王森浩，又有前神華集團董事長陳必亭，仲有前網通高級副總裁張長勝，分明日後仲有大動作，近期成交熱晒身，隨時準備開車，一旦升穿0.2元，仲難追過火車，向上暫時睇0.4元，止蝕定0.15元。
古晨