環球經濟復甦令金融圈人士變動頻繁，好似喺美資大行高盛服務咗13年嘅胡祖六，最近都決定辭去高盛大中華區主席嘅職務，改任集團顧問董事。有小道消息透露，連中投都撬唔郁嘅佢，原來已決定投身私募股權行業搵真銀！
46歲嘅胡祖六擁有哈佛大學經濟學博士學位，喺九七年加入高盛之前，喺國際貨幣基金組織（IMF）旗下嘅亞太局、財政事務局及研究局浸過，由宏觀經濟到國際貿易、公共財政及金融理論都係佢嘅強項，3年前仲傳過連中投都想搵佢過檔，不過最後因為價錢問題冇成事。
今次佢搞私募股權基金，聽聞獲得唔少大機構支持，除咗舊東主高盛之外，建行及淡馬錫都有興趣參與，話晒有胡祖六嘅金漆招牌照住，相信投資回報都應該唔錯。
余絲韻