喺國際機構打工，可能隨時要舉家移居海外工作，眼前所見就有大笨象CEO紀勤同佢哋嘅公關大員Richard Beck，早前先至喺倫敦飛嚟香江駐守。大笨象旗下嘅滙豐銀行國際就以外派僱員仔女嘅成長為題做咗個調查，結果顯示香港係一處養育仔女成本最低嘅地方，而袋鼠國就力壓多國，成為外派僱員心目中湊大細路嘅最佳地方。
根據調查結果，大部分為人父母嘅外派僱員都認為，香港可以為佢哋嘅孩子提供更安全嘅生活環境，而喺細路嘅照料上，無論喺質素及價值觀方面都有最好嘅水平。
超過三分之一嘅父母覺得喺香港住，照顧細路嘅皮費少咗，不過教育仔女方面嘅成本就正在提高，有91%父母話呢方面嘅開支增幅係最犀利。若以細路嘅健康水平來排名，香港就排第4。
今次調查訪問咗嚟自50個國家嘅超過3,100名外派僱員。通常父母都會擔心移居海外工作會對自己仔女嘅影響，而調查就發現，整體上呢啲父母都見到自己仔女好快就適應到喺另一國家生活帶來嘅改變，包括文化、朋友圈及學校生活。
余絲韻