本月二十二日係證券商協會嘅30周年紀念以及新一屆理事會就職典禮，為隆重其事，絲絲聽聞佢哋邀請咗一位重量級人馬「出山」做嘉賓，就係有股壇「校長」之稱嘅聯交所前主席李福兆。
李福兆自八七年股災停市事件及後落台後，近年都好少公開露面，多數喺泰國及多倫多兩邊走，其他時間就會返嚟香港同老友見吓面、吹吓水，或者四圍去旅行。
佢對上一次喺香港嘅大型活動，就係佢個大孫女結婚，當時喺香港筵開多席，唔少金融界人士都有出席。
絲絲聽聞李福兆依家好似去咗坐郵輪旅行，本月二十二日證券商協會30歲生日，佢就會返嚟做嘉賓。
點解佢咁畀面證券商協會呢？根據一名股壇前輩講，原來證券商協會與「校長」有好大淵源，證券商協會喺一九七九年創立，其開辦經費係由遠東交易所鼎力贊助，而遠東交易所正係六九年由「校長」創立。李福兆依家亦係證券商協會名譽會長。
當然，證券商協會副主席及永遠名譽會長蔡陳葆心與「校長」素有交情，亦係請得郁「校長」嘅原因之一啦！
余絲韻