孖妹缸湖遊：精明投資全女打
今日女人大晒，中國第一次紀念「三八」婦女節係一九二四年，當時一班婦女提出「廢除多妻、禁止納妾」等口號，時至今日，女性地位提高、收入增加，隨時比男性更富有，想知道呢班「女強人」點樣搵真銀，由聆聽女人心開始。
莉：莉莉 G︰Gloria 高︰高妹 L︰Lisa
據近期不同嘅調查報告指出，女性理財有道，較男性更有天分；喺金融海嘯下，由於女性投資較穩健，結果贏咗男士，而且亦愈嚟愈多香港女性掌握家庭財政大權。種種調查結果，好似搞到女士們「高不可攀」，但孖妹與以下兩位成功女性傾偈，都發現佢哋唔係外界所諗到咁「女強人」，人生目標並唔係向錢看。
蕭美鳳遇機會小試牛刀
強積金顧問公司駿隆董事總經理蕭美鳳（Gloria）初時喺駿隆只係一名打工仔，不久之後與另一拍檔收購咗駿隆，成為老闆之一。佢成日做唔停兼多諗頭、返工揸Benz、擁有碩士及博士學位，稱得上係一個女強人。
莉︰你嘅成功之道係乜？
G︰成功基本元素係「勤力」，人生幾時都要有目標。我哋呢行好講經驗，諗番喺九七年左右嘅創業期，冇人信你，當時都好難受，自己亦有喊過，所以以前一日只係瞓幾個鐘，就算見一陣間客，都會準備充足，爭取每個機會。
莉︰公司上咗軌道，下一個目標係乜？
G︰我對金錢嘅渴求唔高，可以養活自己、滿足生活已經足夠，錢唔使多到幾代都使唔晒。我下一個挑戰係想帶動多啲人去正視自己嘅退休生活，香港人大多只睇2至3年嘅短期回報，實質為自己準備退休生活嘅人唔多，要多啲學習退休方面嘅知識。
莉︰你覺得男女投資最大嘅分別係乜？
G︰男女投資最大嘅分野，係男士夠勇，願意承擔短期高風險，女士相對夠「韌力」，因為有好多事情例如家庭要兼顧，所以做事唔會太進取。我唔係一啲博到盡嘅生意人，唔會將100%嘅錢擺晒同一個籃入面，發現新機會時會先試一試，放少啲資源落去。不過，我覺得依家嘅男女個性開始有變化，男人變得女性化，女人變得男性化。
分散投資唔急買
莉︰咁你嘅投資應該都幾保守，呢排大市開始調整，幾時會趁低入市？
G︰我嘅投資的確較保守，覺得市場波動性好大，投資組合較分散，包括股票、基金及商品等，當中以一線股比重最多。其實唔可以由朝到晚睇住個市，就算依家有調整都唔會衝住買貨，揀股通常睇行業周期及公司基本因素先會入市。
莉︰女性最鍾意行街買名牌，有時搞到入不敷支，點樣先可以快啲搵到一筆錢嚟創業？
G︰我就冇咁嘅煩惱，對Shopping冇興趣，由細到大唔會追求好多，寧願捐錢畀人好過買一個名牌手袋。至於創業嘅資本，當初都係慢慢儲返嚟。
莉︰你現時感情生活如何？
G︰工作就係我最大嘅男朋友，揀男朋友只要好人就得，其他嘢都睇緣分。其實我已經超級幸福，手腳齊全、五官整齊，雖然我冇宗教背景，但好多謝上天對我好好。依家生活最大嘅成就感嚟自生意，公司受到市場肯定、同事鍾意為公司打工，呢啲都令我好滿足。
梁麗珊投資最緊要保本
蘇皇股票衍生工具及私人投資產品董事梁麗珊（Lisa）有「新一代輪后」之稱，入行時由基礎工作崗位做起，佢自言目前職途尚算順利，平日鍾意行街、買嘢及扮靚。
高︰你嘅第一個100萬點樣賺返嚟？
L︰唔係由投資而嚟，係人工一點一滴累積得來。雖然購物絕對係我嘅喜好，但我每月都會將人工嘅30%至50%儲起嚟。
高︰當時你點用呢筆錢？
L︰我用嚟投資房地產，但冇炒樓，都係買入並持有，暫時未有諗住沽售。其實自己唔係一個好進取嘅投資者，目前未有一個好亮麗嘅投資表現，投資最緊要保本，賺到嘅只當係Bonus（獎金）。
高︰你點睇現今嘅男人？
L︰唔同人有唔同嘅性格，男女好難作出比較，投資時男人唔一定快、狠和決斷，女人亦唔一定好保守。例如當初我決定買樓時，都好快揸定主意，依家層樓升值，證明自己選擇精明及有眼光。喺「生活上投資」就見到男女唔同，男性鍾意買車買錶，女性會花錢喺塊面上。
客觀睇市更清晰
高︰今年有何投資計劃？
L︰今年會多加留意不同嘅資產，有機會就入市。至於股票市場，入行前反而參與較多，依家因為工作關係就冇買股票，覺得唔涉及私人感情，保持中立意見，睇市會睇得更加清楚。
高︰工作最辛苦係邊一段時期？
L︰呢個行業講求競爭性，年資唔係最重要，最緊要係有表現，初入行時最痛苦係認識產品，要了解產品生產流程、技術知識、銷售渠道及售後服務等。好在我有Sales嘅性格，可以克服困難，唔怕醜、厚面皮及性格樂觀，遇到唔識嘅嘢，就謙虛問上司、同事及行內資深人士。
高︰諗住會幾時結婚？
L︰暫時未有呢個打算，首先做好依家工作崗位，先再諗其他發展；其次係盡多啲兒女及朋友嘅責任，過去幾年工作較為拚搏，依家想多啲關心家人和朋友。我入行初期得到好多人嘅幫助，有機會都想好似「師兄扶持師弟」，喺學校當一個Mentor（學長）。
Gloria錦囊
退休前要準備3個袋
1.醫療保險
一旦唔好彩患病，都唔會一下子「燒晒」自己副身家。
2.強積金
應付退休後嘅基本生活開支。
3.「奢侈品」基金
滿足額外嘅物質要求。
Lisa錦囊
工作和投資一樣，認識自己能力、認識自己長處，順勢而行，唔好對着幹。
50.6%人估滙控下試75元
滙控（00005）公布咗令人失望嘅業績，大淡友里昂睇滙控股價會跌到75元，散戶又點睇？據今期《東方產經》網上民意調查，截至上周末晚上6時，相信滙控會下試75元嘅人有50.6%，唔相信就有49.4%。
（高妹）（莉莉）
若有料報畀高妹同莉莉或有嘢問，可電郵money.biz@opg.com.hk