○八年九月底，即張耀堂離開銀行界後不足一個月，全球發生咗百年一遇嘅金融海嘯，依家回看似乎一切自有上天安排。「做咗幾十年嘢，經歷過高低，最緊要係睇開啲，經濟跌完又會上番去。」以往有銀行界「大好人」之稱嘅張耀堂，對住傳媒臉上總係掛着笑容，又常把「開心」掛在嘴邊，原來保持心境開朗正係佢嘅養生之道。
張耀堂話加入VISA後，要學習好多新事物，「信用卡本身係關於時尚生活嘅產品，所以往往出嚟嘅效果開心啲。」
作為香港及澳門地區總經理，張耀堂經常要到澳門出差，單係一月份已去咗好幾趟澳門，除咗工作仲可以飲飲食食，並與當地朋友互相交流美食心得。
除咗調整心態，佢亦十分注重健康，因此堅持運動嘅習慣，網球、健身、跑步係佢嘅至愛項目。雖然離開咗銀行界，佢並冇改變銀行家規律嘅生活節奏，每星期總有一日提早下班做運動，周六到健身室，周日則相約朋友打網球，之後就同朋友促膝暢談天下大事，寫意非常，佢笑說：「咁樣先有本錢食嘢。」
余絲韻