喺金融海嘯期間擔任美國財長嘅保爾森，經歷咗好比電影橋段嘅金融大災難，佢用出書回憶令大家睇得更入神，早前已有傳媒披露過佢本大作《On The Blink》嘅精彩內幕。仲有一個秘密，就係保爾森做到財長原來受到人行行長周小川一句「你唔做，一定後悔」嘅說話所啟發。
保爾森喺回憶錄中披露，○六年春天，美國前總統布殊接受幕僚長等人嘅建議，決定提名保爾森做財長，保爾森對放棄喺高盛嘅高薪厚職，走去做個支持率唔高嘅財政部長冇興趣，況且佢阿媽成日批評「薯仔」嘅政策添，所以佢同白宮講「唔會接受提名」。
嗰陣中國領導人訪美，保爾森獲邀入白宮參加歡迎宴會。陪領導人赴美嘅周小川搵保爾森喺宴會前敍舊，二人走到一個冇人旁聽、冇人記錄嘅房間傾偈，周小川劈頭就話佢應該做財長，否則將來一定後悔。周小川話自己都係公僕，而保爾森又有愛國心，一定可以為呢個世界成就好多嘢。保爾森幾經考慮後，喺○六年中宣誓就任美國財長，亦開始咗佢生命中最忙碌、亦最富爭議嘅兩年半光陰。
余絲韻