醞釀期長達10年嘅深圳創業板，去年十月面世迄今不過短短幾個月，就因為炒風太勁引嚟諸多批評。不過，深圳證券交易所理事長陳東征就話大家不妨寬容少少，因為創業板就好似一個出世冇幾耐嘅小朋友，大家要明白到一個成長中嘅孩子，肯定會有成長嘅煩惱，喺成長嘅過程中可以逐步解決。
內地有人批評創業板上市企業其實以較大型嘅公司為主，反而唔多見到真正嘅中小企，違背咗創立時嘅初衷。陳東征就話呢個問題就好似生BB咁，小朋友出世時係5斤定係9斤，係冇辦法預測到嘅。
佢話自己對創業板嘅前景好樂觀，覺得「有了孩子不愁長」，唔怕個小朋友長唔大。對於有人話依家創業板已出現泡沫，需要深交所出手規範，陳東征亦盡顯慈父本色，強調呢個問題都要喺發展中解決，現時唔可以話個小朋友啱啱生落嚟，家長就要決定畀佢讀文科定係理科，搞文藝定係搞運動。
余絲韻