港交所（00388）今日將會派發成績表，跟住喺下月就舉行股東周年大會，即係又到一年一度嘅董事執位時間。先講政府委任董事方面，今屆有3人任期到期，分別係主席夏佳理、史美倫及鄭慕智；選任董事方面，施德論及黃世雄亦任期到期要再重選。
夏佳理做咗4年主席，市場接受程度已好高，佢今屆再被政府委任做多兩年幾乎可以講係幾肯定嘅事，因此今屆董事執位表面睇嚟好似冇乜特別。不過有心水清嘅人就提醒絲絲，話今屆政府委任董事嘅布局或者可睇到未來主席人選嘅端倪。
話說一直盛傳係下任港交所主席熱門人選之一嘅史美倫，與夏佳理同日加入港交所做董事，換言之已做咗4年。
根據政府嘅「六六」指引，即係每人獲委不超過6項公職以及任期不超過6年，因此若史美倫今屆再被政府委任多做兩年，到夏佳理喺二○一二年退任主席後，佢由於已做滿6年，屆時做主席嘅機會就大減，除非政府認為做主席嘅年期可與做董事嘅年期分開計。
相反，如果史美倫今次不再被委任，或只委任做一年，佢喺二○一二年做主席嘅機會就看高一線，當然以上純屬分析。亦有人同絲絲講，話夏佳理當年做交易所主席都係「空降」，唔係由董事出身，或者兩年後政府又再重施故技呢！
余絲韻