市場熱線：龍源動力澎湃

大笨象（00005）份成績表唔好睇，經過周二急挫7%後，昨日止跌回升，收報81.45元，成交額急降，似乎博業績的短炒盤沽得七七八八，散戶前日築起血肉長城護盤，暫時見效。古勝一向鍾情大笨象，只要係估值合理時，當長期儲蓄買入，長線總有穩定回報。

號碼攜帶不利祖移

行政總裁紀勤表示，當花旗業務不再見紅時，集團的盈利或見雙位數增長，50%-60%的派息比率亦會保持，在下相信當花旗息率回復正常水平時，大笨象份成績表可以見得番人。至於仔仔金錢龜（00011）則繼續走低，最終再跌0.2%，收報108.7元。金錢龜削減派息，當然係趕客行為，昨日有大行唱淡，且看其股價能否守住紅底身份。渣打（02888）業績略低於預期，股價日前已先跟大笨象陪跌，昨日反而回升逾1%，收報183元。

祖國移動（00941）入股浦發銀行兩成，呢個消息係中性，唔會對祖移股價有任何影響。不過，發改委研究手機號碼攜帶政策，並有可能在今年上半年正式試點，首步可能為單向號碼攜帶，可幫助解決固網商乏力在流動電話市場發展的問題，即係對祖移帶來威脅。受消息影響，祖移股價再被質低，收報74.65元，再挫2.4%。相對受惠於政策的二奶電話（00762）陪跌1.8%，反而祖國電信（00728）則微升0.5%。

擬拓展太陽能發電

祖國「兩會」開幕，有關低碳經濟發展提案被列作議題，缸邊友憧憬再有政策傾斜扶持相關行業，新能源股全線落鑊。潔淨能源係全球能源未來發展大趨勢，龍源電力（00916）係祖國規模最大的風力發電經營商，阿媽又係中央企業國電集團。目前，其風電業務屬亞洲「冧巴溫」及全球第五位。

集團現時收入以火電為主，但預期今年風電收入將超越火電，加上未來將停止發展火電項目，風電佔收入的比重會持續提升，下一發展重點項目為太陽能發電。由於龍源的龍頭地位，加上其發展潛力，甫登陸本地魚缸，即成為基金寵兒，預期未來三年的盈利可保持兩至三成的複式增長，預測市盈率將大幅回落，現價可吸。

古勝