瑞銀牛熊證攻星韓

絲絲早排睇外電新聞，已經知道瑞銀今年有向員工發放花紅，點知好事成雙，由三月一日開始，Johnny將會由股票風險管理產品部嘅執行董事升做董事總經理，而董事李靄欣（Anita）就升為執行董事。升職一定離唔開加薪，但Johnny話唔方便透露人工加咗幾多，只話今次獲得獎勵，團隊上上下下都好開心。Johnny又話會增加人手，最近就請咗個大學畢業生，下星期一開始返工。

香港市場以外，瑞銀喺新加坡同南韓都有做窩輪生意，Johnny話計劃緊喺呢兩個市場推出牛熊證，不過估計南韓嘅時間表會快啲，大概喺今年第二、三季。如果做得好，佢哋明年嘅花紅應該會更加和味啦。

余絲韻