本文重點
絲絲尋日同光大控股（00165）行政總裁陳爽食飯，講開舊年一班朋友食飯時，發現好多都有咗BB，唔知今年情況會否同樣墟冚，絲絲自不然問下陳總屋企有無添多個成員啦，點知佢話尋日起身打開報紙睇下流年運程，發覺屬羊（即係佢自己），今年會有添丁之喜，絲絲順勢恭祝陳總今個虎年可以湊夠個「好」字啦。
向囡囡匯報行蹤
陳總出晒名係廿四孝老竇，佢有個囡囡今年應該讀緊小學，佢好錫個女，每日24小時行蹤都會向囡囡匯報，所以有時佢老婆都要問囡囡個老竇究竟又出trip去咗邊。咁好嘅老竇，的確係小朋友嘅幸福，希望陳總今年可以生番個仔啦。
提到依家好多中資證券行都嚟香港收購，陳總話，有好多中資證券行有一個錯誤嘅概念，以為喺香港要攞全牌照同大陸一樣好鬼難，所以咪高價搶購香港證券行，佢又提醒啲香港證券行，趁依家有個好價錢，好快趣賣啦，唔係蘇州過後無艇搭㗎！
余絲韻