本文重點
滙豐環球投資管理亞太區CEO區邦彥，嚟咗香江都差唔多三年，佢好鍾意香江呢處地方，因為佢覺得香江交通好方便，用一陣時間就可以返到公司，呢度啲人工作態度好，效率又好高，又有好多美食，仲有一樣就係香港夠溫暖，佢嚟到香江，都未着過外套。
最凍幾日剛巧遊泰國
香江上個禮拜凍到只係得番幾度，雖然區生係老外一名，應該都凍慣，但無理由上個禮拜咁嘅天氣都唔使着外套？
絲絲追問之下，原來佢嗰幾天剛好正在泰國外遊，如果唔係嘅話，就可以試吓香江濕凍嘅厲害。
區邦彥好入鄉隨俗，呢幾日見到唐人都識得講句「恭喜發財」，仲主動向同事派利是，喺香江嘅二百位同事人人有份，永不落空，不過絲絲問佢到底利是嘅餡有幾多銀両，佢就點都唔透露，其實多少都唔緊要，最緊要係攞個意頭啫。
佢諗諗吓，香江仲有一個好大嘅優點，就係夠晒安全，話說以前佢曾在墨西哥工作，事前啲朋友叮囑佢，千祈千祈唔好搭當地啲的士，因為嗰度好興綁架，所以話香江幾咁好！
余絲韻