本文重點
職場周不時都會有人事變動，更何況銀行界呢個圈子咁細，大家來來去去碰頭嘅都係嗰班人，就好似曾經喺渣打銀行負責信用卡同私人貸款嘅盧慧敏（Mary），今年一月就轉咗去中銀香港（02388），而且睇番老本行信用卡業務。
今次Mary係接替升咗去中銀香港主管個人金融業務總經理梅月嫦個位置。其實Mary之前一直係睇開渣打信用卡嘅，不過後來調咗職負責內部工作，依家重出江湖再戰信用卡，絲絲都好緊張嚟緊中銀信用卡有咩大搞作。聽講佢哋會主力出多啲優惠，同埋繼續谷雙幣卡，中銀既然作為本地人民幣清算行，人民幣業務當然係強項，所以絲絲都好睇好呢張雙幣卡未來嘅發展。
陳銳隆紮職大馬CEO
話時話，舊時宏利人壽保險香港經紀阿頭、經銷副總裁陳銳隆（Michael）原來紮咗職，調咗過去宏利（00945）馬來西亞做行政總裁，認真恭喜恭喜！經紀出身嘅Michael不嬲口才好，唔知佢又講唔講得掂班馬拉人幫佢買保險呢？
余絲韻