本文重點
香港喺金融海嘯之後股樓齊齊雙飛，價量齊升，唔少公司都加人工派花紅，留住人才，絲絲尋日見到經絡按揭轉介首席分析師劉圓圓（Sharmaine），問起佢哋會唔會有人工加，Sharmaine話原來佢哋已經喺上年第四季加咗人工，平均加幅仲有一成至兩成，真係令人羨慕！
樓市暢旺 生意做唔切
上年樓市交投咁暢旺，連帶按揭業務嘅營業額都暴增，銀行爭到頭崩額裂之餘，當然要借助埋按揭中介公司嘅力量。Sharmaine同絲絲傾偈時話，佢哋公司坐到六十個同事，但係成間公司都好靜，原來係因為電話忙到根本無機會響，似乎大嘆有生意做唔切。
據絲絲理解，市場嘅薪酬調整，往往都係睇晒全年業績先決定，早則第一季，遲則第二季，但係經絡去年第四季已經落實加人工，可想而知佢哋受惠樓市不少，仲認真睇得後市加零一咁好！班同事雖然做到無停手，但公司搵到錢同員工一齊分享成果，怪唔之得經絡仝人新春個個都四萬咁口。
好多銀行按揭部去年底已經大張旗鼓話要請人，原因都係有生意做唔切，不過加人工就睇怕未必有經絡咁疏爽，Sharmaine話加幅好睇營業表現，不過一般都有一成至兩成，佢仲同絲絲分享邊個同事加咗人工又升埋職，叫絲絲搵啲雙喜臨門嘅同事請食飯，一齊慶祝下。
余絲韻