內地經過一個禮拜春節假期，對上調存款準備金率消息已消化得七七八八。昨日開市，內地股市的沽壓亦無預期中咁大，上證指數睇嚟暫時已搵到支持。其實內地話退市，大市跌吓跌吓，都已經調整咗咁多，其實再出一啲收緊銀根嘅消息，相信亦係市場預期之內，相信未來着眼點，又會再放番企業盈利方面。
今年春節，內地居民消費增加達兩成，呢股消費力絕對不能小覷，其實去年唔少芬佬都開始睇好內地食品股，指未來會進入高增長期咁話。
古晨就鍾意搞吓啲冷門嘅，神冠控股（00829）於內地主要做膠原蛋白腸衣，由於擁有較高技術，內地除咗進口貨之外，暫時都無咩競爭對手，相對其他食品股經常炒，倒不如小注試吓，6元橫行收集完，博佢炒上見8元，止蝕位可以考慮5.5元。
古晨