本文重點
尋日係銀行公會踏入虎年後首度召開例會，亦係身兼銀公主席嘅渣打香港行政總裁洪丕正虎年首次同傳媒見面，佢十分慷慨兼識做，一早準備好一大疊利是派畀傳媒，仲祝記者朋友今年開開心心，唔使咁奔波勞碌。
擁有「雙重身份」既洪丕正，選用咗渣打出品嘅利是封嚟封利是，至於個餡，就係一張50元渣打鈔票。平日形象親切嘅佢，尋日仲化身埋財神，掛住四萬咁嘅笑容向在場傳媒派利是，人人有份，永不落空。
笑言放返入銀行體系
尋日記者會上，洪丕正講到內地人行喺春節前上調存款準備金率以吸納過剩資金，跟住佢臨走嗰陣，眼見自己派剩好多封利是，就同記者開玩笑，話要吸納手上多餘嘅資金，方法就係將啲錢放返入銀行體系。絲絲估唔到，原來洪丕正都不失幽默，仲識得借題發揮添！
余絲韻