新年前後人事變動通常特別多，就好似商界出身，已經出任數碼港行政總裁六年嘅楊偉雄，下月就會正式投身教育界，過檔理工大學出任行政副校長，數碼港同大學表面看似風馬牛互不相干，不過楊偉雄就話今次轉行其實係有感香港經濟及社會嘅發展，係極之需要人才嘅配合！
楊偉雄由商界投身半官方背景嘅數碼港時，曾經強調自己係要為本港科技產業嘅基建配套作出努力，事隔六年楊偉雄就話係時候接受新挑戰，為本港人才發展作出努力。
成功助數碼港虧轉盈
數碼港至今都存在不少爭議，但公平啲講，楊偉雄不但成功將數碼港嘅商業部分扭虧為盈，佢力推嘅數碼娛樂企業培育計劃更取得唔錯嘅成績，楊偉雄就笑說，數碼港商業部分當初未賺錢，有立法會議員就批評項目係浪費公帑，到取得盈利又有議員批評項目係賺取不義之財，不過佢就強調，言論無損佢同政府與議員嘅合作關係，最重要係大家體諒對方嘅立場，先有利政府與產業界嘅合作。
籲勿放棄多媒體發展
講開數碼媒體發展，意馬國際（00585）要由白武士打救，有意見話事件反映喺香港發展新媒體難以成功，不過楊偉雄相信只係公司本身策略未能配合所致。佢又舉例，數碼港早在○七年已經開始推動數碼3D立體製作嘅發展，當初雖然未獲大家注意，不過隨着《阿凡達》呢套戲嘅成功，足以證明數碼多媒體係有發展空間，大家唔應該輕易放棄！
余絲韻