假後港股愈炒愈靜，一眾大炒家放假未返，市場全無搞作，大嘅唔出手，細嘅又點敢亂郁呢？最慘係內地加準備金單嘢，港股就話逃過一劫，但上證仲未開市，隨時又玩招急插，咁就大件事。個個炒友都靠邊站，市場氣氛又點會好呢？三月份又到炒業績，希望屆時業績佳可以吸引到新資金入市，或者會有另一番景象。
踏入一○年，大市以調整市為主，各個板塊以醫藥股最炒得，眾多藥業股中，古晨覺得中國生物製藥（01177）最有潛力，古晨睇好佢，主要因為上月底中國人壽（02628）連同中信證券齊要求入股，最終以2.1元獲發5%新股，兩個策略股東咁睇好，因去年醫改公司旗下90%嘅藥品都獲列入醫療保險藥物名單，未來生意真係唔愁無得做，唔係點引到啲大孖沙落疊，今次難得個價跌至國壽入股水平，一於追佢，向上睇3元，至於止蝕定2元。
古晨