在魚缸成交極奀的情況下，呢幾日上落並未對後市發展有何啟示。恒指散場收報20,422點，跌111點，國企指數則報11,601點，跌106點，跑輸大市。

隔山買牛未必係好

大笨象（00005）獨撐大市，逆市升0.3%，收報82.55元，集團將於下月一日派成績表，古勝預期成績表唔會太曳，缸邊友對其成績表亦有憧憬，對股價帶來支持。至於祖國移動（00941）散場微跌0.13%，報76.65元。二奶電話（00762）表示不會競購尼日利亞電訊股權，股價跌1.3%。古勝則認為隔山買牛未必係好事，況且為咗爭取祖國3G市場，本身資本支出唔嘢小，再加重財務負擔反而不妙，在下贊成二奶電話管理層的決定。

其他大隻佬乏善可陳，只有大飛機（00293）獲大行唱好，逆市升近1%。波羅的海指數再升，支持航運股逆市做好，中海集運（02866）經過整固守穩10日線後，早段股價重越20日線，最終收報3.14元，升3.6%，成交更倍增配合升勢，料升勢有餘未盡。

半新丁假前威威，假後無勢，俄鋁（00486）、勝利管道（01080）跟國際煤機（01683）再破底，勝利管道更一度跌近三成，散場跌近一成，走勢好難睇。不過，古勝則認為勝利管道同國際煤機基本因素唔差，只係魚缸氣氛不濟，影響缸邊友信心。至於珠江鋼管（01938）亦跌4.4%，惟在4.7元水平見承接，見「小魔怪」在此水平積極接貨，只要守穩4.5元，後市仍有望再創新高。

中央加強農業補貼

第一拖拉機（00038）昨日逆市升1.5%，盤中高見6元，收報5.88元，能守穩在5.3元50日線之上，其中期上升走勢未改。祖國堅決扶持農業發展，在農產品價格攀升下，農村對機械設備的更新意欲提高，一拖當然直接受惠。集團較早前已表示，去年銷售強勁，定單爆滿至今年中，難怪股價一再跑贏大市。

中央日前下達的《一號文件》，顯示今年農機補貼力度將加大，相信對今年一拖的銷售有直接刺激。睇番一拖的股權變動，「快記」繼上月增持過一拖後，再於本月九日，以每股平均價約5.3元，再增持多93萬股，持股量增至6.12%，可見「快記」對其信心十足。雖然一拖已累積唔少升幅，但在國策扶持下，料其銷售及盈利可保持理想增長，中線可反覆做好。

古勝