話說紀勤當年都做過旺角旗艦店「管理層」，昨日開工大吉，亦揀正好時辰，早上搭正十一點走入旺角旗艦店分行向客戶大派利是，唔講唔知，絲絲好鍾意嘅藝人李司棋咁啱都去咗呢間分行，仲好好彩攞到紀勤封利是，聽講佢尋日總共派咗幾百封，認真派到手軟。絲絲收到風，紅包個餡係廿蚊，算過得去啦，但紀大班有另一批利是份餡非常「和味」。

辦公室碰面「見者有份」

原來紀勤依家辦公室喺滙豐總行三十四樓，只要邊個喺嗰度撞到佢，都會「見者有份」。照計其他同事想大班利是，可能都要上去多借幾次洗手間，行多幾轉先有機會。

其實銀行家派利是嘅傳統一向都存在，不過，絲絲覺得，今次紀大班派幾百封就認真有指標性，個客到封利是，隨時好過擺一百幾十萬喺滙豐收一年息。