本文重點
迎接虎年來臨，渣打預先向客戶拜個早年，佢哋一班同事自發性組隊，又扮財神又舞獅，喺過去兩日分別去咗尖沙咀、德福、將軍澳、北角及長沙灣5間人流較多嘅分行拜年。該行個人銀行業務銷售業務總監周兆麟亦參與其中，親自請分行內嘅客人「搵銀」。
員工組隊與客同樂
佢哋嘅財神好鬼後生，應該都係「80後」，唔似我哋成日見到鬍鬚長長、年紀有番咁上下嘅財神爺，佢哋個財神仔除咗請客戶「搵銀」，亦預備咗啲揮春及利是畀客戶抽，到訪嘅每間分行都預備咗10封利是，雖然入面嘅「餡」唔係Cash，但都係好受歡迎嘅超市現金券，分別價值50蚊及100蚊，抽到現金券固然開心，就算抽到揮春都可以攞番個好意頭。平時返工返得多都悶啦，拜年團隊嘅同事可趁着呢啲節日以另一種形式服務客戶都幾好呀，既可娛人又可娛己。
余絲韻