本文重點
被行內喻為「台灣電子一哥」嘅鴻海集團將會舉行尾禡宴，喺即將農曆新年之際，啲員工梗係希望有多啲獎金、花紅，集團總裁郭台銘亦冇令夥計失望，今年佢哋抽獎就有成6,000張市值高達8億元新台幣（約1.93億港元）嘅股票，認真唔講得笑。
郭台銘派錢唔手軟
不過唔係人人有份永不落空，好似話呢6,000張股票只係畀啲表現特別出色嘅員工抽獎，但其他員工亦唔使太難過，事關鴻海出咗名福利好好。
其實郭台銘一向都出手闊綽，早幾日至走咗去台北縣消防局，話想幫啲消防員加油打氣，咁就無喇喇喺10分鐘之內，派咗成2,000封利是，總共派咗40萬元新台幣，啲消防員爭住去攞利是，氣氛不知幾咁熱鬧同開心。絲絲相信佢向自己集團員工派利是時，一定唔會令員工失望嘅，據聞佢都有心理準備，會視乎現場氣氛再加碼，保證令大家滿載而歸，過番個肥年咁話喎。
余絲韻