本文重點
天氣凍嘅時候，捧住一杯暖笠笠嘅粟米杯，嗰種感覺應該好甜。亞達盟環球期貨副總裁潘志偉（Alex）平日對住各式各樣嘅期貨，有食得嘅，亦有唔食得嘅，佢最情有獨鍾嘅就係玉米。
首項鑽研商品期貨
Alex話佢最初加入金融界時，主要係做基金及經濟分析，與期貨沾不上邊，不過其後就喺機緣巧合之下開始研究商品期貨，仲愈研究愈有感情，當中第一樣佢花心機研究嘅玉米就成為佢嘅至愛，Alex期待有一日可親身參觀玉米田呢！
玉米田暫時睇唔到，Alex度蜜月時就去過南非參觀金礦，體驗到工人開採金礦嘅艱苦。嚟緊嘅世界杯喺南非舉行，咁鍾意「虛擬踢波」嘅Alex，唔知會唔會舊地重遊現場睇波呢？Alex話佢好鍾意踢波，不過依家年紀大咗，為咗少啲碰撞，就轉而多打網球及羽毛球。雖然係咁，佢打遊戲機時仍會首選足球遊戲，覺得「虛擬踢波」好刺激。
余絲韻