「被套」「草莓」唔啱聽

香港股市用紅色代表跌，綠色代表升，內地就啱啱相反，所以股票報價板一片紅嘅話，股民就最雀躍。老行尊話識得一個內地股民，十年前投身股海後就冇着過綠色衣物，即使佢已屆古稀之年亦如是，連食物都偏好紅色。

至於送禮，喺內地亦有一套忌諱要留意，千祈唔好送「被套」及「草莓」，皆因發音與股票「被套」及「炒沒」相近，唔係個個都想收。

絲絲記得多年前內地亦有一啲相似忌語，例如叫「爹」（跌）的都改稱「爸」；不叫「哥」（割）改叫「兄長」；玩具「熊」最不受股民歡迎等。其實忌諱呢樣嘢不信則無，絲絲認為股民最重要係做功課，多啲研究股票嘅財務資料以及認清國際大勢，咁至可以趨吉避凶，做個醒目嘅投資者。

余絲韻