農曆新年長假在即，適逢內地剛剛公布消費者物價指數只係升1.5%，遠不及市場估計2.3%咁高，通脹並非預期中大，即係短期未必會加息，大市即時有反應挾上，可惜入市資金始終唔多，炒味欠奉，暫時雖然止咗瀉，但仍未見有大炒機會，反正入市風險唔細，倒不如先放一個長假期，好過飽食驚風散過年。
潮流興炒環保節能，去年更成為基金追貨嘅主流項目，今次大市回氣再上，相信最快翻炒都應該係相關股份，而古晨反而睇好隻首長科技（00521），事關佢旗下有LED業務，都係同環保節能相關，呢啲項目一旦做大做強，隨時可以令盈利倍數上升，而最重要係股價喺0.6元牛皮咗好耐，大跌風險不高，最值得小小注買定，等炒上，向上睇0.85元，止蝕可以考慮0.56元。
古晨