本文重點
騰訊（00700）喺內地嘅即時通訊（IM）業務「QQ」，做得勁就係人都知，唔單止令主席馬化騰身家暴漲再暴漲，更令公司成為唔少散戶嘅心頭好，皆因騰訊每次業績都能夠交出非常「靚仔」嘅表現。無他嘅，內地市民幾乎每買一部新電腦，就會開個QQ嘅戶口，喺內地網民比例仍然唔算高嘅情況下，QQ用戶未來應該仲有大幅增長。
傳僅一買家出價到位
然而，騰訊未有恃住自己有大班內地網民作後盾就乜都唔做，近日老外媒體就報道話佢哋有意「走出去」，即係跑到海外收購。媒體話騰訊有意競購AOL計劃出售嘅ICQ，仲話AOL已經喺7個買家中揀出4個進入下一輪評估，更有消息人士話，ICQ嘅意向競購價格約2億美元（約15.6億港元），而目前好似只得一個潛在買家嘅出價高於呢個數。
據一名宅男老友話，雖然ICQ係第一代嘅IM工具，但喺歐洲市場仍然幾受歡迎，依家佢哋全球就有4,000萬至5,000萬用戶，若騰訊真係買得成，除咗高增長概念之外，公司以後就多一個海外市場概念啦。至於與騰訊一齊爭嘅，仲有俄羅斯投資集團、Facebook嘅投資者DST、南非多媒體巨頭Naspers以及Google等。
余絲韻