大會安排咗一位年僅5歲半嘅小鋼琴家陳子潤以及著名鋼琴家馬聰演奏樂曲，仲有曾參與電影演出嘅「少年七小福」表演功夫，又一字馬又打觔斗。

滙豐銀行個人理財業務部客務策劃高級經理翁嬋嬌同絲絲講，話呢個表演係為咗配合滙豐運籌理財戶口嘅精神，即係「把握今天的努力，成就將來更成功的自己」。

剛啱喺本月初紮職嘅滙豐銀行個人理財及工商業務主席霍嘉治，以及滙豐銀行亞太區行政總裁王冬勝專登亦抽空出席，王冬勝睇完表演後笑笑口話，好欣賞小朋友嘅表演才華，原來佢平時都會聽吓古典音樂！

獲選09最佳輪商

講起滙豐，仲有一樣喜事，最近騰訊網就搞咗個「2009年最佳港股券商及窩輪商選舉」，最佳券商分別係大福證券、國泰君安（香港）及光大控股，而滙豐及麥格理就獲選為09年度最佳窩輪商。今次選舉係由內地數十萬名網友參與投票，身為評委之一兼有「少女股神」之稱嘅申銀萬國證券（香港）聯席董事王雅媛亦有出席頒獎禮。

余絲韻