有人話「80後」嘅年輕人唔捱得苦，工作態度麻麻，只係識得成日發夢升職加人工，早兩日絲絲喺中環與恒豐證券董事總經理張華峰、研究部董事林家亨（Simon）歎下午茶，講起「80後」，佢哋好自然咁講番自己年少時嘅奮鬥史。
張華峰做老闆打地鋪
「80後」泛指八十年代出生、30歲未夠嘅年輕人。張華峰笑言自己曾經都係「80後」，當年嘅月薪只得一千蚊，收工後仲會去做兼職，但求搵多二、三百蚊傍身，但從無任何怨言。直到八十年代初，佢開咗自己嘅證券行，為咗睇實唔同國家嘅股市狀況，好多時都會鋪張地氈喺公司度瞓，第二日又再開工。
林家亨酒樓推點心車
至於Simon，絲絲諗住佢去加拿大留學，家境應該都唔錯，點知佢話：「讀中二、中三時嘅暑假，喺阿媽『搭路』之下，我就去咗酒樓推點心車賣點心，叫做幫補家計。」
時間飛逝，Simon笑言張老闆都已由「肥仔張」變成「肥佬張」！十年人事幾番新，絲絲見到張老闆與Simon喺業界有今時今日嘅成績，背後一定付出咗好多汗水和努力。絲絲知道唔係個個「80後」都懶懶閒，有好多都好畀心機做嘢，放工後又去進修，至於仲未知自己想做啲乜嘢嘅後生仔女，真係要向佢哋學習吓。
余絲韻