近期港股弱過藥煲，加上長假期在即，市場氣氛靜到痹，不過死貓都會彈一彈，恒指上周五留下一個500點下跌裂口，唔排除大戶會趁假期前沽壓少啲，回彈一下補回裂口。尋日嘅反彈市真係等到個個頸都長，但可惜入市資金都係咁少，啲股仔更加好似食咗豬油糕咁，大部分都無反應，睇來成班鑊鏟友已經提早收晒爐。
現時內地央企搞重組，古晨仲記得去年底中國五礦集團收購湖南有色金屬控股集團51%股權，而且向湖南有色（02626）提出1.73元嘅全購價。單刁係人都知五礦並非真係有意私有化湖南有色，只係程序上要咁安排，近期就算大市跌，湖南有色個價都好硬淨，當然啦，個個吼實未來五礦集團會點搞注資嘛，所以計我古晨話，趁近期有人沽吓貨，低位儲番少少都有着數，唔貪心向上睇4.2元都幾唔錯，止蝕可以考慮2.7元。
古晨