花旗缸邊友漠視企業理想的成績表，花旗魚缸為跌而跌，古勝亦無眼睇。不過，美元呢兩日已漸失去上升動力，歐元和澳元反彈，帶動昨日亞太區魚缸反彈，雖然本地魚缸早段低開，但隨住祖國魚缸靠穩，本地魚缸亦跳彈床。

大行唱好祖國移動

恒指在過去三個交易日已急挫逾5%，在嚴重超賣後，反彈亦好正常，只係長假期前夕，成交額奀到爆，加上期貨場持續大低水，古勝相信魚缸升至19,800點有阻力，要重上二萬關難度更高。恒指散場收報19,790點，升239點，國企指數則報11,200點，回升1.9%或211點。

藍色大隻佬幾乎全面反彈，不過巨無霸大笨象（00005）續跌，抹殺了其他大隻佬的努力。歐洲信貸風險困擾大笨象，其股價昨日再跌0.7%，收報79.3元。在下認為目前係低吸大笨象好機會，根據過往經驗，大笨象的風險管理，遠勝花旗一眾錢莊及投行，況且「美人林」跟「瑞士佬」均力撐，指大笨象受「歐豬五國」財務問題的影響較少。另一重量級祖國移動（00941）彈0.8%至76元，「最信」表示其網絡覆蓋率較高，以及高質量的網絡質量，令其在智能電話市場上取得主導地位，表示祖移可跑贏大市，目標價更定在105元。

昨日表現最突出係本地地主，港鐵（00066）項目日內招標，加上近日在樓價高企的情況下，未有影響新盤銷情。「息魔」未有耐重生，磚頭自然成為資金寵兒，本地地主值得睇高一線。

古勝多次表示紅色錢莊應逢低吸納，除咗因為其現價市帳率已貼近歷史低點外，祖國魚缸最快在今季尾或下季初推股指期貨，重磅的紅色錢莊，包括建行（00939）、工行（01398）及中行（03988）定納入指數成分股，屆時指數基金跟大戶，不得不重投呢三個巨頭懷抱，目前正係低吸好機會。

「油魔」最近沒精打采，油價暫守在70美元之上，預期今年油價唔會如過去般出現勁升狀況，對以下游業務為主的中石化（00386）有利。斷估專家普遍預期，中石化去年第四季煉油業務再度虧損，惟虧損將大幅減少，加上中石化近日明顯跑輸魚缸，目前的估值算係合理。

順勢短炒見好要收

集團積極向阿媽爭取落實收購海外資產，目前正對一些項目進行評估，包括勘探項目。中石化海外油氣資產今年的年產量達1,400萬噸，今年若能落實收購資產，其估值將有所提升。

上周中石化裂口下跌，股價失守多個支持位，短線超賣相當嚴重，料反彈可持續，或能回補下跌裂口，即6.1元水平。至於能否成功尋底止跌回勢，則視乎大市走勢，短線博反彈見好即收。

古勝