上星期港股真係悲情，二萬關得而復失，上周五更加倒水一樣，恒指跟國指分別急挫3.3%及4%，真係嚇親唔少炒友。詩詩都算好運，日前以0.54元買入英皇證券（00717），上周五竟能逆市靠穩無起跌，肯定有後着，繼續持有靜待好消息。
雖然大市走晒樣，但仍有個別二三線股逆市逞強，華基光電（00155）上周五在大跌市竟能逆市升近12%，相信好事近。華基光電目前發展的光伏業務，受惠國策扶持，公司自○七年轉型後，雖然尚未錄得盈利，但截至○九年九月底止的中期業績，虧損已逐步收窄。
市場一直憧憬公司將有項目注資，估計今年內有所動作。此外，亦有傳聞指華基光電或發展汽車電池業務，若然消息落實，將有一番新景象。華基光電上周五在成交增加配合下，股價逆市勁升逾一成，更創52周新高，唔排除公司短期內有好消息公布，惹來春江鴨偷步入市，若今日大市喘定，料股價可再下一城。
詩詩