本文重點
曾獲最佳央行行長榮譽嘅任志剛，雖然已從金管局總裁呢個位退下來，依家生活得好寫意，但絲絲收到風，佢最近反而瘦咗4磅。任總同友人講，話佢係畀人「追到瘦」，因為自從啲人知道佢冇做金管局後，紛紛邀請佢出席講座、研討會等，而最頭痛係好多人邀請佢做番嘢。
澳央行座談會講Talk
由依家到年尾，佢仲有好多「人情債」要還，好似喺本周日就會飛去悉尼，出席下周澳洲央行舉行成立50周年嘅座談會，席上佢亦會發表演說，期間好似仲有國際清算銀行亞洲年會等央行活動，佢都會出席，到時又會見番好多央行行長朋友，一定有排傾。
「過完冷河」唔做全職
雖然任志剛唔再係央行行長，但就繼續被邀請出席呢類央行行長活動，仲有機會演說，真係好大面子！數數手指，再過多一、兩個月佢就「過完冷河」，到時做乜都得啦，但佢就講到明一定唔會做全職，時間分配上已經有個大框架，一半時間畀屋企，另一半時間就會用喺報國、學術以及做非執行嘅職務上。
任志剛做市場監管者咁多年，好清楚自己嘅強項，首先唔使講梗係風險管理，管治亦唔弱，佢更誇口話自己最叻係做整頓嘅工作。經過金融海嘯嘅蹂躪，相信好多機構都需要改善呢三方面，任志剛自然成為佢哋招手嘅對象，或者佢依家係苦惱緊到底做邊份工好呢？
余絲韻