港股彈完一日後尋日雖然高開，但入市資金少之又少，最終都係無力再上，鑊鏟友睇機嘅人多，入貨嘅人少。近日傳內地最快可能今個月加息，總之就不停有消息出嚟嚇人，咁嘅環境又的確好難叫人入市，相信大市過年前都係要繼續靜。
雖然大市未有好大起色，惟個別股份走勢都值得關注，古晨就留意到隻華基光電（00155），仲記得去年炒太陽能概念時，由於華基光電從事光伏太陽能電池，當時股價一口氣炒上0.15元水平，之後橫行咗成大半年，股價變化唔大，近期市況轉弱，華基光電股價都輾轉由0.17元落番到0.144元，不過尋日一支陽燭就追番晒之前嘅跌幅，走勢甚勁，之前集團配售過一批認股權證，行使價就係0.143元，好明顯幕後人唔想個價穿0.143元，所以古晨覺得市況好番少少，佢隨時可以炒番上去見0.22元，止蝕位不妨考慮0.14元。
古晨