本文重點
國壽（02628）前首席投資官劉樂飛去年轉工，被委派去中信證券旗下產業投資基金管理公司做董事長兼CEO，近排公司完成首隻產業投資基金嘅募集，以90億元成為內地最大嘅人民幣基金。話晒曾喺保險界一哥嘅投資部門做揸弗人，劉總講起新工作一派輕鬆，話性質遠比做國壽時簡單，仲話負責90億元嘅投資對其他人可能有壓力，但對佢哋管理團隊嚟講真係完全冇負擔。
產業基金完成募資
唔好以為內地錢淹腳，股權基金要募資就好容易，其實喺國務院批准設立嘅第二批5隻產業基金試點當中，到依家只有中信旗下嘅呢隻綿陽產業投資基金成功完成咗募資工作。
劉樂飛承認內地產業基金欠缺成熟嘅管理團隊，好難成功融資，不過對佢哋公司嚟講，呢個唔係大問題，事關包括佢在內，管理團隊曾經喺唔同公司負責超過800億元資金嘅投資工作，喺內地市場係最有經驗嘅投資團隊嘞。
相比國壽多元化嘅投資，劉總話依家淨係負責產業投資基金簡單好多，基金去年已用20幾億元投資10個項目，依家無論喺保險、消費金融、電子支付等金融領域，抑或係消費、原材料及機械製造，佢哋都有興趣，並正積極物色投資對象。
余絲韻