本文重點
仲有約半個月就到農曆新年，相信好多人已收到各式各樣嘅利是封，遲啲仲會去銀行換新銀紙封利是，但諗深一層，本港每年要印製大量新鈔畀市民封利是，的確有欠環保。金管局多年來都推廣市民用「迎新鈔」（即「雖舊仍新」嘅鈔票）封利是，今年更舉辦咗一個別開生面嘅「迎新鈔」對聯比賽，以宣揚環保訊息。
三發鈔行提供兌換
據知今年比賽分中學組、長者組及公開組，金管局一共收到600幾份參賽作品。絲絲睇過啲得獎作品，每一對都工整協調，可見參賽者嘅語文水平了得，喺度揀咗中學組冠軍嘅作品同大家分享：「迎新鈔支持綠保，愛舊紙喜接紅包」。
金管局發言人話，過去幾年喺「迎新鈔」方面嘅推廣工作成效理想，臨近農曆新年推出嘅新鈔佔總出鈔量，已由○六年嘅79%降至去年嘅59%。
今年3間發鈔銀行將由二月二日起提供新鈔兌換服務，亦會有足夠嘅「迎新鈔」以供選擇。絲絲奉勸各位，為環保起見，大家都係盡量換少啲新鈔，多啲用「迎新鈔」啦！
金占士