本文重點
俄鋁（00486）經歷千辛萬苦終於上到市，成為首家喺香港上市嘅俄羅斯公司，佢哋亦好隆重其事咁送咗啲「家鄉特產」畀港交所（00388），就係俄羅斯套娃嘞，仲係用鋁嚟做嘅添。
上市公司送禮物一向以琉璃居多，今次俄鋁用自家鋁做咗隻精美嘅娃娃送畀港交所，都算有心思。絲絲查過，套娃嘅來源其實係好感人㗎。
套娃故事感人
話說從前有一對相依為命嘅小兄妹，妹妹喺放羊途中被風雪所困而失蹤，哥哥好掛念佢，所以就刻咗一個木頭娃娃帶喺身邊，如是者一年又一年過去，哥哥每年都刻一個大啲嘅，代表長大咗嘅妹妹。
俄羅斯套娃一個比一個大，確實好精緻，喺俄羅斯仲有許願娃娃嘅名添！傳說中只要對住娃娃許願，娃娃會因為想重見天日而盡力完成心願，所以同許願娃娃畫上等號。話時話，今次都係港交所行政總裁李小加首次以行政總裁身份出席上市儀式，啱啱收咗套娃娃，唔知李小加又會向娃娃許乜嘢願呢？
余絲韻