逾150員工列隊迎接

呢位集團CEO駕到，總行未到早上9點就已準備好迎接儀式，再加埋一大班記者、保安、工作人員，總行入口兩條人龍逐漸成形，初時較為疏落，隨着時間愈接近9點，人龍就愈嚟愈長同愈闊，企吓企吓，列隊嘅滙豐夥計已多到超過150人。

紀勤出現，場面即刻混亂，攝記忙住幫佢影相，呢個時候，人龍就開始拍掌夾道歡迎，個勢好似恭迎皇上一樣。紀勤亦好識做，走埋去與恭迎佢嘅同事握手。

返Office歎杯中國茶

絲絲聽講列隊嘅員工係來自不同部門，但見唔到我哋熟悉嘅鄭海泉及王冬勝等高層。由於場面有啲混亂，紀勤冇接受訪問就直接上咗辦公室，但為免傳媒冇米落鑊，佢最終都有接受訪問。

有人好有興趣想知佢上到自己辦公室後會做啲乜，佢話會飲中國茶，因為自己喺英國都有6、7年，所以唔係好想飲英國茶。佢仲話期待盡快投入工作，不負客戶及股東嘅期望。

余絲韻