港股21,000點關破完都唔夠四日，20,000點又已經危危乎，雖然最終總算力保不失，但港股表現真係弱過藥煲。雖則話呢兩日恒指跌勢已經喘定，但啲股仔就繼續殺唔停，如果由高位計，無咗三、四成者大有股在，都唔好話唔傷。
大市咁跌法，鑊鏟友似乎信心盡失，咁又係嘅，過去兩個禮拜不停跌，當中真係無出現過似樣反彈，都教人幾心寒，但正所謂「死貓都會彈一彈」，如果今日大市再跌，應該係博反彈嘅時候。
古晨留意咗隻中國澱粉（03838）好耐，去年澱粉價狂漲，佢業績應該唔會太差，早前狂炒上唔到車，現時回調應係搵位上車嘅時候，古晨聽聞佢做緊路演，基金反應唔錯，如果市況回穩，隨時又發力狂炒，一於吼實佢，向上睇2元，止蝕定1.33元。
古晨