急跌後隨時有後抽

內地大閂水喉，唔止嚇怕祖國同香江魚缸，就連一向強勢嘅歐美魚缸，高位亦都頂唔順要跟一跟插，花旗魚缸出現三隻烏鴉走勢，走勢變得好樣衰，周二晚早段雖曾經有過80幾點反彈，都叫似模似樣，點知最終都係衰收尾，祖國魚缸就更樣衰，3,000點嘅鐵底亦告失守，股民信心盡失，上證由高位回落超過兩成，去年十一月嘅2,923點支持岌岌可危，如果再穿，睇怕要落番2,800點。恒指破完一關又一關，21,000點失守後唔夠四日，連20,000點關都一度守唔住，不過近日跌得咁急，亦不排除會有後抽。

雖然中港兩地股市跌不停，其實去年祖國「保八」成功，照計唔少企業都可以交足功課，尤其係現時咁低息嘅環境，只要股票回報率仲係吸引，熱錢應該仍會以投資股票為先。祖國預估今年經濟增長有9%，相對歐美各地仍得輕微增長甚至係衰退，真係天同地比，既然內地經濟前景未有變，如果話熱錢正撤出祖國魚缸，似乎又唔係咁啱數，一月過後就到農曆新年，過完年踏入三月份，又到基金埋位睇業績選股嘅時候，如果到時候股價回番去較低水平，企業業績又交到數，自然可以吸引到班大孖沙留低繼續玩。

過去兩日恒指開始喺20,000點邊緣喘定，睇番啲藍色大隻佬，沽壓亦減弱咗，只係啲二、三線股仔仲係繼續屠殺。股仔當炒時係寶，無人炒時就係草，一旦轉勢，殺起上嚟跌三、四成亦真係視作等閒，以古勝經驗，如果現時想入市博吓反彈，點都係搵啲大價股買較着數，話晒成交夠易走位，有咩風吹草動要轉身都易啲。

天然氣產量急增長

去年內地汽車銷售達到1,300萬輛，車多咗，汽油嘅銷售自然亦有唔錯嘅增長，何況今年入冬天氣異常寒冷，燃氣價格已經大幅上升。去年年底，中石化（00386）嘅天然氣產能大幅增長，預計到今年年底，天然氣產能增幅可達五成，相信可以令中石化擺脫近年因煉油業務嚴重虧損，而導致業績表現飄忽的負面印象，不妨把握今次調整逢低吸納。

古勝