本文重點
去年樓市急速反彈，帶動各華資、外資地產代理行生意報捷。第一太平戴維斯香港及澳門行政總裁李偉文同Vincent話，公司去年港澳區物業代理營業額近四億元，利潤約1.1億元，雖然較前年逾1.7億元少咗，但連同去年港澳區物業管理利潤約一億元，以及內地業務利潤急升約一倍至約8,200萬元計，公司整體大中華區利潤有近三億元，同前年差唔多，未來希望挑戰四億元利潤目標。
至於今年樓市預測，該行料今年本港寫字樓售價可升10%至15%，澳門住宅方面，由於去年樓價估計升咗近50%，所以今年升勢會放緩，估計可升10%至15%。
樓價急升 估價漸脫節
近一個月樓價急升，不但買家追唔切，就連銀行估價都一樣，Vincent八到，最近有唔少樓價升得急嘅屋苑出現輕微估價不足，差幅約1%至3%，好似將軍澳中心同維景灣畔，有銀行向代理同買家表明，如果唔急於喺一個月內完成交易，建議交易期可延長一個半月至兩個月，等市場消化近月屢創新高的成交價後，屆時銀行估價會寬鬆一點，就可以估足價。
（Vincent Lau）