上周五港股大坐過山車，恒指一度跌穿20,300點，但午後竟戲劇性地回升至20,700點樓上收市，本來以為港股呢一下V彈後可以靠穩，但周五晚美股急挫，ADR全面下跌，預計今日港股將再次下試低位，恒指呢個星期或失守二萬點。詩詩上周三已全面清倉，成功避過大跌市，目前走勢兇險，都係等大市跌定再考慮入場。
隨着武廣高鐵通車，內地鐵路股潛力再次受重視，廣深鐵路（00525）因而受追捧。集團去年首九個月盈利雖按年下跌5.1%，但第三季度盈利實際是增長6.4%，而且季度客流量及貨流量均錄得雙位數字增長，反映其業績持續改善。
為配合高鐵通車，廣深鐵重新調配班次，取消部分重複的班次，短期或影響部分收入。不過內地從去年十二月底開始提高鐵路貨物運價，料可抵銷部分損失。另一方面，市場一直憧憬母公司會對廣深鐵進行注資，亦係刺激股價上升的因素，可吼位吸納。
詩詩