匯：散戶Ginna
炒匯經驗：3年
17分 積極型
睇圖炒要止蝕
「金融市場無不勞而獲嘅事，我炒外匯時唔會太盲目，而且匯市比較公開和公平，只要有波幅就有得玩。現時我主力炒澳元及歐元，平時分析主要係睇圖表，炒短線時會睇15分鐘、30分鐘及1小時圖，做長線時就睇1小時、4小時及1日嘅圖，並會留意主要6隻貨幣走勢。另外，我又會做足風險管理，識止賺亦要識止蝕。」
股：散戶Norma
炒股經驗：1年半
19分 積極型
主攻內銀內房
「我買股票會以七、三比例作長、短線投資，間中會聽到股票貼士，但自己未必一定會買，反而會睇吓公司背景、業務再決定。我向來買中資及內銀股為主，去年抽中新股恒盛地產（00845），但呢隻股『潛水』，依家仲蝕緊錢。我今年仍會主力投資內銀及內房股，因為比較熟悉，信心會大啲。講到投資弱點就一定係懶惰，功課做得唔足。」
金：散戶Tony
炒金經驗：20年
11分 穩健型
吼數據炒波幅
「當有好消息或重要數據出現時，倫敦金喺一、兩分鐘波幅已經可以係半日或全日嘅波幅，所以要賺錢唔難，不過輸錢風險都唔細。我一般持貨約兩、三日，或者一個星期，我覺得炒金最重要係唔好鑽牛角尖，有時候諗得太多反而令投資決定出錯。」
美匯仍弱 澳紐元看俏
莉莉：知你做外匯出身，大家都話美國遲早加息，你點睇美元走勢？
趙善銓：近期美國嘅經濟數據及企業盈利表現都麻麻，加上總統奧巴馬話仲會繼續救市，我估計退市未有咁快住，而美元喺第一、二季仍會繼續受壓，下半年先有較大機會反彈。
高妹：即係話上半年唔好買美元升啦，咁匯市散戶可以買乜嘢外幣呀？
趙善銓：可以買澳元及紐元，因為呢兩個國家嘅經濟復甦較為穩健，息口仲有啲上調空間，好大機會可以「財息兼收」。至於歐元，我覺得佢今年屬於易跌難升，少買為妙。
港股趨穩 難奢望大賺
莉莉：咁港股方面，你有乜睇法？
趙善銓：去年嘅熱錢因素已經喺股市反映得七七八八，今年經濟唔會太差，股票亦唔會大跌，但股友要賺到好似去年嘅50%至60%升幅利潤就比較難，要有心理準備，任何投資嘅回報率都會得番20%。
高妹：中國經濟備受看好，股友應該留意乜嘢投資板塊？
趙善銓：中國收緊銀行資本充足比率，對內銀股會有影響，但政府一收總有一放，如加推內需股撐起經濟；另外，全球推行環保概念，對資源能源股亦有利。
金價攀1300 高位小心
莉莉：最近金價輕微回落，可唔可以追入呢？
趙善銓：由於美元喺上半年仍會疲弱，所以金價唔會大跌，更有機會上試每安士1,300美元，不過升到呢個水位時，亦係大家需要小心嘅時候。
高妹：對於三位散戶嘅投資方法，你有乜嘢意見畀佢哋？
趙善銓：Ginna識得睇晒6隻主要貨幣走勢，又做足風險管理，投資態度算唔錯，但佢睇分鐘圖就真係太短線，以佢經驗應該睇一、兩日嘅圖會穩陣啲。Norma選股時唔會聽「貼士」，呢個已經係好開始，不過投資真係要做足功課先得。至於Tony，佢買倫敦金一定涉及槓桿，風險都幾大，所以要謹記做好止蝕。
過去一年資金大量湧入，本地股市及樓市累積升幅已經唔少，唔知股友們覺得香港有冇資產泡沫呢？根據今期《東方產經》網上民調，截至上周末晚上6時，67.1%人話有泡沫，32.9%人就話冇。
高妹、莉莉
若有料報畀高妹同莉莉或有嘢問，可電郵money.biz@opg.com.hk